ЕКІБАЕВ ЖАҚСЫБЕК ЖИЕНБАЙҰЛЫ 1950 жылы Саржал ауылының «Күншуақ» қыстағында туған. 1967 жылы Саржал орта мектебін үздік бітірген. 1971 жылы Семейдің педагогикалық, 1985 жылы зовет институтын тәмамдаған. 1970 жылы оқудағы жетістіктері, институттың қоғамдық өміріндегі белсенділігі, студенттік құрылыс отрядтарындағы еңбегі ескеріліп, «В.И.Лениннің туғанына 100 жыл» мерекелік медалімен, Қазақстан ЛКСМ Орталық комитетінің «Құрмет грамотасымен» марапатталып, есімі педагогикалық институттың құрмет кітабына жазылған. Ж.Екібаев еңбек жолын Абай ауданының Қызыл ту кеңшарының бастауыш комсомол ұйымының секретары, Ж.Молдағалиев атындағы орта мектептің мұғалімі болып бастады. 1972-73 жылдары Кеңес Армиясы қатарында әскери борышын өтеді. 1973-1983 жылдары Саржал орта мектебінде мұғалім, М.Әуезов орта мектебінің оқу ісінің меңгерушісі, Күлмен ауылдық кеңесінің төрағасы, Жданов атындағы кеңшардың партком секретары қызметтерінде болды. 1983 жылы тамызда Абай аудандық партия комитетінің секретарлығына жоғарылатылды. Ж.Екібаев тарихи өңірдің идеологиялық жұмыстарына басшылық жасауда ізденісімен, адамдардың қоғамдық-саяси белсенділігін арттыруда, ауыл көркемөнерпаздарының шығармашылығын дамытуда тың бастамаларымен көрінді. Белгілі қоғам қайраткері, Абай ауданын ұзақ жыл табысты да жемісті басқарған Хафиз Матаевтың мектебінен өтіп, шыңдалды. 1984 жылы әйгілі «Қаламқас» ансамблінің Алматыда М.Лермонтов атындағы театрда жаңа бағдарламамен концерт беруіне, әншілердің Қазақ радиосына жазылуына, ансамбль жөнінде арнайы телефильм түсірілуіне басшылық жасады. Тәуелсіздік жылдарында Жақсыбек Екібаев аудан әкімдігінің ұйымдастыру бөлімінің меңгерушісі, аппарат басшысы, ұзақ жылдар ішкі саясат бөлімінің бастығы қызметтерін үлкен абыроймен атқарды. Ауданның әлеуметтік-экономикалық дамуына, қоғамдық-саяси өміріне қосқан айрықша еңбегі үшін «Астананың 10 жылдығы» медалімен, облыс әкімінің «Құрмет грамотасымен» марапатталып, «2012 жылдың үздік мемлекеттік қызметкері» атанды. Жақсыбек Екібаевты аудан халқы қасиетті қарасөздің жілігін шағып, майын ішкен Абай елінің көсем сөз шебері, ғұмырын ұрпақ тәрбиесі мен аудан келешегіне арнаған зиялы, Парасатты азамат, айтулы тұлға ретінде құрметтейді. Оған 2013 жылы «Абай ауданының құрметті азаматы» атағы берілді. Ж.Екібаев – ұлағатты отбасының ұйтқысы, әкенің өнегелі жолын лайықты жалғастырып келе жатқан отағасы. Жұбайы Алма Мұхамедияқызы ұзақ жылдар мектепте орыс тілі пәнінен дәріс берген ардагер ұстаз, қызы Дарияш — Алматы мемлекеттік дәрігерлердің білімін жетілдіру/. Институтында терапевт-дәрігер, ұлы Дастан — Жарма ауданында құқықтық статистика жөніндегі аға прокурор, ұлы Рүстем — Л.Гумилев атындағы Еуразия ұлттық университетінде тарих факультеті деканының орынбасары, ғылым кандидаты, доцент.
Ғалым Қуанышбаев Абай ауданының Құрметті азаматы